O Observatorio da Mariña pola Igualdade convoca para o 8 de marzo “a todo o feminismo da Mariña Lucense para combater contra as políticas que tratan de silenciarnos”
O Observatorio quere expresar “a súa posición desvinculante de todas as actividades lúdico-festivas que en torno ao 8M se organizan en diferentes concellos da Mariña: viaxes, xantares populares e concertos”. O Observatorio da Mariña pola Igualdade denuncia o branqueamento “das palabras Feminismo, Igualdade e Sororidade nunha data imprescindible para as nosas reivindicacións”.
O colectivo quere visibilizar os sectores máis vulnerables onde traballa maioritariamente as mulleres, como son os servizos de limpeza e o sector téxtil e poñer en valor “a loita que levaron a cabo as compañeiras da limpeza de Lugo nos últimos meses, que resistiron cunha longa folga ata que acadaron mellorar as súas condicións laborais, demostrando o necesario que é a unidade feminista cara a un mesmo fin: varrer o patriarcado”.
O Observatorio da Mariña pola Igualdade en colaboración coas mulleres feministas da Mariña “organiza e convoca unha manifestación feminista para o próximo venres 8 de marzo ás 20h en Ribadeo baixo o lema “Varrendo o patriarcado” á que animamos a participar a todas as persoas que sintan como súa a necesidade da unidade no movemento feminista mariñán”.
O Observatorio organiza unha serie de actividades co seguinte calendario:
Sábado 2 de maio no IES Dionisio Gamallo en Ribadeo:
Obradoiro de Batuke e material, de 15h00 a 18h30.
Venres 8 de marzo, na praza de abastos de Burela:
Convivio e apertura do quiosco 8M, a partir das 14h00.
Obradoiro de cartaces, de 16h00 a 18h00.
A participación foi, é e será un dos grandes motores do cambio social: contamos contigo.