Un home de 56 anos de idade, A.M.T.S., foi rescatado e reanimado polos servizos de emerxencias tras caerse ao mar este mércores, preto da lonxa de Celeiro segundo informou do CIAE 112 Galicia.
Os feitos ocorreron pasadas as 10,00 horas, cando varias persoas alertaron aos servizos de Emerxencias de que un home se caeu ao mar. Aínda que os particulares conseguiran sacalo da auga, o home achábase inconsciente. O CIAE 112 alertou a Urxencias Sanitarias-061, así como a Salvamento Marítimo, Servizo de Gardacostas, bombeiros de Viveiro, Garda Civil e Protección Civil.
Posteriormente, os bombeiros informaron de que o home xa estaba consciente, despois de que se lle aplicasen técnicas de reanimación e de que fose atendido polos profesionais de urxencias sanitarias. Así, o 061 enviou á zona unha ambulancia de soporte vital básico medicalizada cun equipo de Atención Primaria, e unha ambulancia de soporte vital avanzado, que foi a que o trasladou ao Hospital público da Mariña.