A Xunta outorgou a autorización administrativa previa e de construción do parque eólico Restelo, un dos vinculados a Alcoa, que se situará entre os municipios lucenses da Fonsagrada, Baleira, Becerreá e Navia de Suarna, impulsado por Greenalia. Deste xeito, o Goberno galego outorgou a autorización construtiva para unha ducia de parques vinculados a Alcoa. Nove deles impulsados por Greenalia (Felga, Friol, Gato, Monte do Cordal, Penas Boas, Carballal, As Louseiras, Monteiro e Restelo) e tres de Enel (Chao do Marco, San Cristovo e Serra do Colmo). Agora, só queda pendente de que a Xunta dea luz verde á Pena do Pico, de Greenalia, segundo explican fontes da Xunta a Europa Press.

O Diario Oficial de Galicia (DOG) publica este martes a resolución da Consellería de Economía, asinada polo director xeral de Planificación Enerxética, Pablo Fernández Vila, que concede o permiso ao parque Restelo. En novembro de 2023, o parque Restelo conseguiu a autorización ambiental por parte do Goberno galego. O proxecto prevé seis aeroxeradores para unha potencia instalada duns 40 megawatts. Conta cun orzamento de 28,5 millóns de euros. En cambio, o pasado mes de febreiro, o comité de Alcoa queixábase de que seguía á espera por parte do Goberno central do permiso de construción de cinco parques de Endesa, así como dos nós de interconexión de parques de Greenalia.

PARQUE DENEGADO

Noutra orde de cousas, o DOG publica o arquivo da Xunta do parque eólico Monte Carrio II, entre os concellos de Lalín e Vila de Cruces, coa denegación da autorización de construción ao non superar o trámite ambiental. Estaba impulsado por Iberdrola. Así mesmo, tamén sae un aviso no DOG para a localización dos propietarios dunha vintena de parcelas afectadas polo parque eólico Airas, entre os municipios de Alfoz e Mondoñedo, promovido por Fergo Galicia Vento-Alfoz.