O presidente da Federación Galega de Municipios e Provincias (Fegamp), Alberto Varela, e a alcaldesa de Burela, Carmela López, mantiveron este martes un encontro para avaliar a situación da Unidade de Atención á Drogodependencia (UAD) do municipio lucense, así como das 13 existentes en Galicia, e demandaron á Xunta que se faga cargo do persoal sanitario destes centros.
A rexedora de Burela sinalou que desde finais do ano 2020, e ao longo do tempo que leva a UAD, quedaron varias veces sen profesionais sanitarios. Así mesmo, reprochou que o concello espera “o cronograma de tarefas comprometido pola Xunta” que, tal e como destacou, “non acaba de facerse efectivo”.
Para a alcaldesa, é “incomprensible” que estas unidades “non reciban da Xunta o tratamento que requiren para o servizo que prestan” e lamentou que “a falta de profesionais por xubilacións siga sen ser cubertas e que desde o Sergas non se resolva esta situación con urxencia”.
Pola súa banda, Alberto Varela considera “indubidable” que se trata dunha competencia que non debe ser asumida polos concellos. “Desde os concellos tense claro que non é unha competencia que ten que seguir sendo asumida, e estabamos a esperar a constitución do novo goberno da Xunta; xa está o novo goberno nomeado, polo que agora teñen que cumprir cos seus propios compromisos definitivamente, asumindo ás UAD dentro do Sergas”, salientou o presidente da Fegamp.