A Fiscalía solicita seis anos de cárcere para un home que abusou sexualmente de xeito continuado da súa sobriña sendo esta menor de idade e aproveitando os períodos de descanso que pasaba visitando en Viveiro á familia da nena.

A Audiencia Provincial de Lugo fixou para o día 16 de maio, o mércores que vén, o xuízo contra este home, para o que o Ministerio Fiscal pide tamén unha orde de afastamento da vítima durante 16 anos, e unha indemnización de 18.000 euros, así como que abone os gastos sanitarios derivados da súa asistencia, cifrados en 361,59 euros.

Os feitos ocorreron entre mediados do ano 2016 e abril do 2017, cando o acusado, “guiado polos seus máis baixos e denostados instintos sexuais” e “sendo plenamente consciente do alcance dos seus actos”, abusou sexualmente da menor durante os lapsos de tempo nos que visitaba á súa familia en Viveiro.

Segundo o escrito presentado pola Fiscalía, o home someteu á sua sobriña a “prácticas de contido e significado inequivocamente sexual”, nas que “facía obxecto de toda sorte de tocamentos para así poder satisfacer os seus instintos sexuais”.

A NENA NON DIXO NADA “POR MEDO”

“O acusado aproveitaba a realizar (os tocamentos) con renovadas intencións lascivas cada vez que quedaban sós na casa durante o tempo que alí permanecía, e (estes) aconteceron en repetidas ocasións, ata o mes de abril do pasado ano 2017, no que se tivo coñecemento dos actos atentatorios contra a indemnidade sexual da menor”, reflicte o documento, que subliña que a nena non dixo nada sobre a situación que estaba a padecer “por medo”.

Por iso, a Fiscalía considera os feitos constitutivos dun delito de abuso sexual continuado a unha menor de 16 anos e pide para o home unha condena de seis anos de prisión, así como unha orde de afastamento da súa sobriña de 200 metros durante 16 anos, con imposibilidade de comunicarse. Tamén deberá indemnizala.