Un total de sete persoas resultaron feridas, entre eles tres menores, despois de bater un camión contra un turismo parado á altura do quilómetro 532 da Autovía do Cantábrico (A-8), á altura de Lourenzá.

Segundo a información ofrecida polo Centro Integrado de Atención ás Emerxencias (CIAE) do 112 Galicia, recibiuse aviso do accidente ás 14.53 horas deste mércores. O vehículo atopábase parado na beiravía da autovía, en sentido Begonte.

Daquela, o 112 mobilizou a Urxencias Sanitarias, Bombeiros de Barreiros, Grupo de Emerxencias Supramunicipal (GES) da Pontenova, a Protección Civil de Lourenzá e á Garda Civil de Tráfico.

As sete persoas, as seis que viaxaban no coche e o condutor do camión, foron trasladadas ao Hospital Público da Mariña.