Un incendio calcinou o pasado sábado unha casa baleira na aldea de Figueirúa, na Pontenova. O lume orixinouse arredor das nove da noite e arrasou por completo a vivenda nuns minutos.

O Grupo de Emerxencias Supramunicipal (GES) pontenovés non puido facer nada por salvar o inmoble, de madeira e en bo estado de conservación. Si conseguiu evitar que o lume alcanzara outras vivendas cercanas, coa axuda dos membros do parque de bombeiros de Barreiros.

O incendio, en principio, non tivo que ver coa celebración do San Xoán e puido deberse a un curtocircuíto. Os propietarios, residentes en Barcelona, non estaban pola zona.

18 INCIDENCIAS EN LUGO

O 112 rexistrou un total de 18 incidencias na provincia de Lugo durante a noite de San Xoán. Outras 20 producíronse en Ourense, 92 na Coruña e 87 en Pontevedra.

As chamadas estiveron causadas por fogueiras descontroladas ou sen autorización, solicitude de asistencia médica por inxesta de alcol e o requirimento das forzas da orde por mor de pelexas e vandalismo.