Un veciño da parroquia de San Pedro de Rinlo, de 75 anos, faleceu este xoves despois de quedar atrapado baixo o tractor que manexaba no núcleo urbán desta parroquia do municipio de Ribadeo.

O sinistro aconteceu na Rúa Campo de María Méndez pasadas as sete da tarde. O 112 mobilizou aos servizos sanitarios, Protección Civil e Policía Local de Ribadeo, os bombeiros do parque comarcal de Barreiros e a Garda Civil. Non poideron senón confirmar o falecemento da vítima, e será a Benemérita quen investigará o caso.

CASE 60 EN GALICIA EN TRES ANOS

Os accidentes de tractor son unha problemática da sociedade galega. Na Mariña Lucense, os dous últimos aconteceron en setembro e outubro, co falecemento dun veciño de Mondoñedo e outro da Pontenova, respectivamente. Segundo La Voz de Galicia, ata o pasado mes de febreiro producíranse 56 destes sinistros nos últimos tres anos.