O home que resultou ferido este luns nun accidente de tráfico na autovía A-8, ao seu paso pola localidade lucense de Ribadeo, no que faleceron os seus pais e a súa irmá, permanece moi grave na UCI do Hospital Universitario Lucus Augusti (HULA). O sinistro produciuse poucos minutos antes das 12.00 horas, á altura do quilómetro 513 da A-8, en dirección Oviedo, e a vía permaneceu cortada mentres o operativo de emerxencias traballaba na zona.

Tal e como llo trasladaron as persoas que contactaron co 112 Galicia, o vehículo saíu da vía e bateu contra o pilar dun viaduto. Os servizos de emerxencias desprazados ao punto confirmaron o falecemento das tres persoas, mentres que o 061 trasladou outra en helicóptero medicalizado ao HULA.