Dúas persoas resultaron feridas este mércores tras saírse da vía no municipio lucense de Barreiros. Ambas tiveron que ser liberadas. Segundo informou o 112, ás 21.25 horas do mércores, o 112 recibiu un aviso do 061, no que se informaba dunha saída de vía en San Cosme de Barreiros. Segundo a información facilitada, o vehículo envorcara e podería haber persoas atrapadas no interior.

Así, deuse aviso aos Bombeiros de Barreiros e aos axentes da Garda Civil de Tráfico. Unha vez finalizada a intervención, os Bombeiros comunicaron que fora necesario empregar o material de excarceración para liberar as dúas persoas que viaxaban no interior do vehículo. Finalmente, ambas foron trasladadas ao centro hospitalario de referencia.