Un ciclista faleceu esta tarde de domingo na estrada N-642, á altura de Vilaronte, no concello de Foz. Pasadas as 13:10 horas, un particular daba a voz de alarma ao 112 Galicia: un ciclista xacía no chan e varios transeúntes iniciaran xa as manobras de reanimación cardiopulmonar para tratar de salvalo.

Aínda que as primeiras chamadas apuntaban a un atropelo debido á posición da bicicleta e o corpo na calzada, os servizos de emerxencia confirmaron ao chegar ao punto quilométrico 29,5 que o accidente non fora provocado por ningún vehículo. O ciclista sufriu unha indisposición súbita mentres pedalaba, o que provocou que caese ao asfalto xa sen coñecemento.

O suceso desencadeou unha resposta inmediata de todos os corpos de seguridade e saúde. Ata o lugar desprazáronse efectivos do 061, do Parque de Bombeiros de Barreiros así como axentes da Policía Local de Foz, Garda Civil e Protección Civil.

A gravidade do cadro clínico fixo que se solicitase a intervención do helicóptero medicalizado do 061, que iniciou o seu voo cara á Mariña. Porén, a aeronave tivo que cancelar a súa aterraxe a medio camiño unha vez que os médicos presentes no lugar confirmaron o deceso do home, tras esgotar todas as posibilidades de reanimación. Aínda faltan as probas forenses definitivas, mais todo indica que a morte se produciu por causas naturais.