Dúas persoas foron rescatadas no mediodía deste martes no encoro do Río Cobo, no municipio lucense de Cervo, despois de que a lancha neumática na que viaxaban sufrise unha fuga. O 112 Galicia tivo constancia do suceso ás 12.40 horas, a través da chamada dun particular que solicitaba axuda urxente. Segundo relatou, el e unha acompañante atopábanse agarrados a unha boia a uns 200 metros da beira, tras sufrir unha perda de aire na embarcación na que navegaban.

O 112 informou os bombeiros de Viveiro, á Garda Civil e aos efectivos de Protección Civil. Pouco despois, os servizos de emerxencia confirmaron o rescate do home e a muller. A pesar de atoparse ambos en bo estado, solicitouse atención sanitaria para a muller, que presentaba un episodio de nerviosismo derivado da situación, polo que o 112 Galicia tamén informou a Urxencias Sanitarias de Galicia-061.