Unha muller de 28 anos de idade, M.R.C., perdeu a vida este martes tras saírse da vía o vehículo que conducía pola estrada LU-P-1510, e quedar na cuneta, segundo informou o CIAE 112 Galicia. O 112 recibiu o aviso por este accidente pouco antes das 8,30 horas, cando un particular chamou para informar de que vía un vehículo na cuneta, no quilómetro 2 da estrada provincial que une Cervo e Burela.

Segundo o informante, había unha persoa fóra do coche, apoiada na xanela, e aparentemente falecida. Desde o CIAE pasouse aviso aos servizos de Urxencias Sanitarias de Galicia-061, aos bombeiros de Viveiro, á Garda Civil de Tráfico e á Policía Local. O 061 desprazou ao lugar unha ambulancia de soporte vital avanzado e unha ambulancia de soporte vital básico, ademais de persoal do CSM de Cervo. A pesar dos esforzos, os profesionais sanitarios só puideron confirmar o falecemento da muller, que era a única ocupante do coche.