A Garda Civil detivo a cinco persoas, a quen relaciona cun roubo nunha vivenda de Lourenzá , así como cos delitos de danos á propiedade, ameazas, coaccións e lesións, por unha liorta ocorrida a principios de xuño.

A investigación iniciouse en maio, cando o propietario dunha vivenda denunciou un roubo con forza nun inmoble deste municipio. A Garda Civil relacionou este feito con outro ocorrido posteriormente: uns danos nunha leira e alpendre propiedade da mesma persoa que denunciara o roubo, e identificouse a unha persoa por eses danos, que coincidía cun dos implicados no roubo.

O sospeitoso acudiu horas máis tarde, supostamente, ás inmediacións da vivenda do denunciante para ameazalo. Semanas despois, a Garda Civil sorprendeu a dúas persoas cando pretendían ameazar e coaccionar a un familiar do denunciante, despois de cortar o paso ao seu vehículo en metade da rúa, e de tratar de apealo do coche.

O pasado 4 de xuño, os axentes teñen coñecemento de que se estaba producindo unha liorta en Lourenzá, na que dúas persoas portaban armas brancas de considerables dimensións e presentáronse no lugar onde se atopaba o denunciante dos feitos anteriores. As persoas armadas tentaron que a vítima lles deixase entrar no seu domicilio e, posteriormente, tentaron convencelo de que lles acompañase a outra localidade para entrevistarse cunha terceira persoa.

O denunciante negouse e resistiuse, polo que os sospeitosos agredírono e metérono nun coche. O vehículo foi interceptado pola Garda Civil e procedeuse á detención dos agresores. En total, por todos estes feitos, foron detidas 5 persoas e tanto os arrestados como as dilixencias practicadas foron postos a disposición do xulgado.