A Garda Civil detivo a dous veciños de Foz, de 43 e 37 anos de idade como supostos autores dun delito contra a saúde publica na súa vertente de tráfico de drogas.

Segundo informa a Garda Civil, os feitos ocorreron na localidade de Foz cando se observou unha persoa facendo entrega duns envoltorios de plástico transparentes a unha segunda persoa. Posteriormente comprobouse que os envoltorios que contiñan substancias de cor branca, o que fixo sospeitar que se tratase de cocaína. A persoa que entregou os dous envoltorios acabou recibindo a cambio unha cantidade de diñeiro.

A persoa que recibiu os envoltorios foi identificada e posteriormente confirmouse que a substancia era cocaína, cun peso que daría no mercado para unhas 150 doses. Unha vez comprobado isto, procedeuse á detención do posuidor da droga. Porén, nesta primeira actuación a persoa que fixo a entrega puido fuxir do lugar.

A Garda Civil procedeu a realizar as pescudas necesarias para chegar á localización da persoa fuxida que finalmente foi detida. As dilixencias policiais e as persoas detidas foron postas ao dispor do Xulgado de Garda de Viveiro.