Os servizos de emerxencias rescataron este venres o cadáver dun home que foi localizado na auga, preto dunha barca, no porto de Celeiro, no municipio lucense de Viveiro.

Foi un particular o que chamou ao 112 pasadas as 12,00 horas deste venres para indicar que atopara o corpo dun home flotando no mar, entre unha embarcación atracada e o peirao de Celeiro.

De inmediato, o CIAE 112 pasou aviso a Salvamento Marítimo, ao Servizo de Gardacostas de Galicia, ao 061, á Garda Civil, á Policía Nacional e Local e aos efectivos do Servizo Municipal de Protección Civil de Viveiro.

Ademais, foi precisa a intervención dos Bombeiros de Viveiro, que, segundo indicaron os efectivos de Protección Civil, tras recuperar o corpo, foi trasladado na embarcación que derivaran ao momento ata o peirao deportivo.