A Plataforma Sanitaria da Mariña convocou para o vindeiro mércores 30 de novembro unha manifestación ante o centro de saúde de Burela en defensa da calidade asistencial no servizo de atención primaria.

A portavoz da plataforma, Montse Porteiro, precisou que, ademais da concentración, recollerán firmas para a Iniciativa Lexislativa Popular en defensa de reforzar a Atención Primaria.

“Hai moitas cousas polas que manifestarse. A atención primaria que está nunha situación caótica e os centros de saúde que non contan con persoal para atender á xente”, aseverou. “Os médicos, as enfermeiras, o persoal administrativo que colle vacacións ou collen permisos e non están a ser substituídos, co que se sobrecarga ao resto do persoal“, lamentou.

Montse Porteiro asegurou que a Inicitiva Lexislativa Popular, xa pasou a barreira das 10.000 firmas, o limiar necesario para o seu traslado ao Parlamento de Galicia. Tanto é así que despois de varias semanas de recollida, desde a Plataforma Sanitaria da Mariña confían en poder chegar “ás 75.000 ou 100.000 firmas” en apoio da Atención Primaria.