Sesenta firmas amosarán e venderán os seus produtos na Feira de Artesanía e Antigüidades da Pontenova, que se celebrará do 6 ao 9 de decembro.

Os dous sectores confluíran na mostra comercial que, segundo asegurou Francisco Martínez, tenente de alcalde do Concello, tivo “máis solicitudes que espazos dispoñibles”.

A feira, que se amplía nun día con respecto a pasadas edicións, reunirá trinta anticuarios de diferentes puntos do Estado, Francia e Portugal, e outros tantos postos de artesanía do barro, da madeira, do coiro ou da xoiaría.

OFICIOS TRADICIONAIS

A mostra poténciase con actividades paralelas como a exposición ‘Cos pés na terra‘, que recolle pezas, ferramentas e retratos dos últimos zoqueiros e galocheiros da provincia.

Ademais, ao longo das tres xornadas, haberá diferentes demostracións de diferentes oficios tradicionais.

A axenda da feira compleméntase cunha xuntanza de vespas, motos e coches clásicos, que tamén se convocou nas dúas últimas edicións e que espertou un gran interese entre os visitantes.

EXPECTATIVAS

O Concello agarda que pasen pola feira “unhas 8.000 persoas” e que a afluencia de público beneficie o comercio e a hostalería local. Os restaurantes da localidade ofertarán un menú ‘Especial Feira‘ a un prezo de 15 euros.

A entrada á mostra, que se ubicará na Praza dos Fornos, será gratuíta. O horario de actividade será de 11.00 a 14.00 horas e de 16.00 a 21.00 horas.

A Deputación de Lugo achega 12.000 euros á organización do evento.