Os alcaldes de A Mariña, Ferrolterra e Ortegal enviaron unha carta á Xunta de Galicia para solicitar unha entrevista co presidente do Executivo autonómico, Alberto Núñez Feijóo, e coa conselleira de Infraestruturas, Ethel Vázquez. Os rexedores queren manter unha xuntanza cos representantes do Goberno galego para abordar a situación na que se atopa o tren que percorre o litoral norte.

O alcalde de Burela e presidente da Mancomunidade de Municipios de A Mariña, Alfredo Llano, asegura que “no último pleno da agrupación de concellos da bisbarra, os alcaldes afectados decidimos ir todos xuntos a esa xuntanza, e o mesmo van facer os rexedores de Ortegal e Ferrolterra”.

SEN LABORES DE MANTEMENTO

Llano resalta que a zona afectada abrangue a uns 200.000 habitantes, e que o servizo que o tranvía ofrece a estas persoas é insuficiente. “O tren de proximidade ten que ser garantido, potenciado e defendido. Non se están a facer as labores de mantemento precisas para que este servizo estea garantizado durante moito tempo e isto é preocupante”, afirma.

O presidente da Mancomunidade de Municipios de A Mariña asegura que “queremos defender o tren porque afecta a moita xente, tanto na xestión administrativa como na académica e na atención sanitaria”. Tamén ve este servizo como “unha alternativa para o turismo” e como básico “para fixar poboación”, porque, argumenta, a xente valora este tipo de infraestruturas á hora de escoller residencia.