A Deputación de Lugo acometerá obras de mellora en tres estradas de titularidade provincial no concello de Ribadeo, que conectan o interior do municipio.
Trátase da LU-P-5203, de Cedofeita á antiga estación por Couxela, da LU-P-5204, do mesmo núcleo a Regocorto por Arante, e da LU-P-5205, do Porto por Vilaosende ao primeiro dos viais mencionados.
ONCE QUILÓMETROS DE FIRME
As actuacións consistirán na rehabilitación de 11,3 quilómetros de firme con aglomerado en quente e na renovación da sinalización horizontal e vertical. En concreto, na LU-P-5203 actuarase entre os puntos quilométricos 2,4 e 7,8; na LU-P-5204, do fito 0 ao 2,8; e na LU-P-5205, do 0,7 ao 3,8.
A Deputación investirá 354.000 euros nestes traballos, que agarda rematar en novembro. Segundo o goberno provincial, un milleiro de persoas beneficiarase das actuacións.
O presidente da Deputación, Darío Campos, a deputada Mayra García e o alcalde de Ribadeo, Fernando Suárez Barcia, supervisaron o inicio dos traballos na LU-P-5205.
MELLORA DE ACCESOS RURAIS
O rexedor de Ribadeo indicou que este venres comezou o período de abrir as plicas das ofertas presentadas polas empresas para a realización das obras de aglomerado asfáltico que o goberno local custeará con 250.000 euros de fondos propios.
Estas actuacións, que suporán a mellora de varios accesos rurais, realizaranse en Vilaselán, Covelas, Santalla e Couxela.
REME-VILAMAR, FINALIZADA
A Xunta de Galicia finalizou as obras de mellora da estrada Reme-Vilamar, nas que investiu un millón de euros.
A conselleira de infraestruturas e mobilidade, Ethel Vázquez, resaltou que as obras, que afectan aos municipios de Ribadeo e Barreiros, “melloran a seguridade dos usuarios”.