O voceiro do grupo municipal popular de Ribadeo, Daniel Vega, atribuíu ao Concello a situación do ascensor do Ceip Gregorio Sanz, que non conta con permisos polo que un alumno que o precisa non puido utilizalo no inicio do curso. O goberno local asegurou non ter recibido da Xunta de Galicia, que acometeu as actuacións, nin solicitude de licenza de obra nin tampouco proxecto para a construción do elevador onde había un montacargas. O concelleiro dos conservadores saíu en defensa do Goberno autonómico e afirmou que é o goberno local “quen ten que facer unha modificación do contrato de mantemento. Só é un trámite o que ten que facer o goberno de Fernando Suárez Barcia”, argumentou.
Vega afirma que “o goberno local si que tiña coñecemento destas obras porque foi informado en agosto tanto pola dirección do centro coma pola Xunta”, facendo fincapé en que “dentro do Consello Escolar hai un representante do BNG no goberno local que tiña coñecemento destas obras. É vergoñenta a súa actitude”, engade.
O concelleiro popular sostén que “o goberno local debería sumar e non poñer trabas burocráticas” ao non validar as obras, cun orzamento de preto de 40.000 euros, o que considera “un acto vergoñento e desleal. É responsabilidade do goberno local que esta instalación que conta cunha inversión tan importante non estea a funcionar”, concluíu.
O Xornal da Mariña tentou poñerse en contacto coa Xunta da Galicia para coñecer a súa versión sobre os feitos, sen obter resposta.