O PP de Ribadeo alerta sobre o deterioro dalgunhas rúas do casco urbán da vila, como Benito Prieto Coussent e Deputación. Os populares instan ao goberno local a que arranxe estas vías xa que, aseguran, “xa se produciron accidentes de viandantes polo seu mal estado”.

O voceiro do grupo municipal popular, Jesús López Penabad, afirma que esas rúas requiren “dun arranxo inmediato e profundo”. O dirixente do PP local asegura que “na rúa Deputación, recentemente arranxada porque hai meses renovaron parte do pavimento, está habendo accidentes continuamente por tropezos de peóns nas beirarrúas”.

CAMIÑO DE SANTIAGO

López Penabad lembra que se trata “dunha rúa moi transitada, por veciños e peregrinos”, xa que é parte do traxecto do Camiño de Santiago. Deste xeito, urxe ao Concello a que arranxe a vía antes de que “pase algo grave que cause danos ás persoas e repercuta nas arcas municipais”.