Arredor dun milleiro de escolares dos municipios de Trabada, Barreiros e Ribadeo participou nunha xornada de achegamento á Garda Civil enmarcada dentro do Plan Director para a Convivencia e a mellora da seguridade nos centros educativos e a súa contorna.

O acto, que se celebrou no peirao ribadense, contou coa presenza da subdelegada de Goberno, Isabel Rodríguez, e do alcalde, Fernando Suárez Barcia.

SEIS CENTROS EDUCATIVOS

Participaron no evento alumnos dos centros ribadenses Ceip Gregorio Sanz, do IES Dionisio Gamallo Fierros, do CIFP Porta da Auga e do CPR Sagrado Corazón; tamén do CEIP Xosé Luis Taboada, de Trabada, e do CEIP San Cosme barreirense.

EXPOSICIÓN DE MEDIOS

A xornada educativa consistiu nunha exposición de medios e varias demostracións. O alumnado asistiu a exhibicións acuáticas e de cans adestrados, aéreas e de montaña. Membros do Servizo Marítimo da Garda Civil participaron no encontro por primeira vez na provincia de Lugo.

Tamén acudiron ao encontro membros da Unidade de Helicópteros, do Grupo de Actividades Subacuáticas, especialistas de Montaña, axentes da Agrupación de Tráfico, Seguridade Cidadá e Patrulla Fiscal, do Servizo de Protección da Natureza, do Servizo de Intervención Rápida e da Policía Xudicial, así como os capitáns xefes da cuarta e primeira Compañía da Comandancia de Lugo.

PLAN PARA A CONVIVENCIA

Dentro do Plan Director para a Convivencia prográmanse charlas nos centros educativos, tanto por parte da Garda Civil como por parte da Policía Nacional. A prevención do acoso escolar, os riscos de internet ou a violencia de xénero son algúns dos temas tratados.