Alumnado de seis países visitará o Ceip de Cervo na semana do 22 de outubro. A iniciativa enmárcase dentro do programa Erasmus +, que xa levou a dúas escolares do centro a Grecia no pasado mes de maio.

Grazas a este proxecto europeo -que ten unha duración de dous anos– Cervo exercerá como anfitrión de 18 alumnos e 14 docentes, procedentes de Polonia, Portugal, Grecia, Turquía, Lituania e Romanía.

APOIO DO CONCELLO

O alcalde de Cervo, o popular Alfonso Villares, e a coordinadora do programa no colexio, Esther Basanta, reuníronse para coordinar as actividades a realizar durante a visita, que contarán co apoio do executivo municipal.

RECEPCIÓN NO CONSISTORIO

Entre elas, haberá unha recepción no Concello o día 22. Tamén se programaron excursións e actividades lúdico-culturais que afondarán no desenvolvemento persoal do alumnado e no coñecemento da nosa cultura.

SEMANA STEM

O Ceip de Cervo foi un dos centros preseleccionados para participar na semana STEM, promovida pola Xunta de Galicia, que naceu co obxectivo de fomentar o espírito científico e tecnolóxico do alumnado. As actividades terán lugar nos meses de outubro, novembro e decembro, en función das quendas, en réxime de internado.