A asociación cultural Aturuxeiros de Bravos celebra o vindeiro sábado a segunda edición da Malla Tradicional. O evento etnográfico, que servirá de lembranza para algúns e axudará a outros a coñecer a historia da zona, celebrarase na localidade ourolesa de Rego da Ponte.

Os actos comezarán ás 11.30 horas, cunha introdución ao traballo da malla. Ás 12.00 comezarán as tarefas. Ao seu remate comezará a sesión vermú e desde as 14.30 horas haberá un xantar asequible para todos os petos.

OBRADOIROS E XOGOS

Pola tarde seguirá a festa, con obradoiros de amasado e cocedura de pan. Tamén haberá un taller de iniciación ao traballo do coiro. A xornada festiva continuará con xogos populares.