Traballadoras da Mariña Lucense manifestáronse o pasado martes en Madrid nunha protesta que segundo o Sindicato de Técnicos de Enfermería (SAE) reuniu a máis de 6.000 profesionais de Técnicas en Coidados de Enfermería (TCE).

As obreiras saíron de madrugada nun autobús desde o Hospital Público da Mariña, para reclamar ao Goberno central que retirase o borrador do Real Decreto que establecía o título de TCE e os aspectos básicos do seu currículo, relegándoas en competencias a tarefas de limpeza e xestión.

As manifestantes reclaman que se lles recoñeza o nivel 3 -pertencente aos ciclos formativos de grao superior-, pois desde hai anos “padecen un nivel absolutamente desfasado da súa preparación e praxis real”. Finalmente e trala protesta, o Executivo central comprometeuse a retirar o borrador de Real Decreto e a retomar as negociacións cos sindicatos.