A directiva da Asociación de Veciños de Burela O Vencello sinala que recibiu “numerosas queixas da veciñanza” no referente a atrasos nos trámites administrativos por parte da administración local.

A agrupación veciñal lemanta que “catro comicios electorais (eleccións xerais de abril, municipais de maio e novamente xerais en novembro, máis a repetición das votacións municipais nunha mesa electoral en novembro pasado) fixeron que o Concello permanecera “paralizado en detrimento dos veciños”. Burela non tivo goberno ata o pasado martes, cando o PSdeG-PSOE conseguiu sacar adiante a estrutura do seu executivo en minoría tras aceptar a proposta de retribucións por dedicacións parciais presentada polo BNG.

A esta circunstancia hai que engadir tamén “a falta de persoal municipal debido a
baixas, traslados e ausencias por permisos vacacionais que ven sufrindo o Concello nos
últimos meses”, expón a asociación. “Esta precariedade de persoal está a provocar que áreas tan importantes para o desenvolvemento diario dun concello, como poden ser Urbanismo ou Secretaría, estean funcionando ao ralentí e acumulen atrasos considerables na tramitación de xestións chaves para o desenvolvemento da vida diaria do maior núcleo de poboación da comarca da Mariña”.

O Vencello confía en que os novos responsables municipais poñan freo a esta paralización que está a sufrir a actividade municipal de Burela nos últimos nove meses.

O COLECTIVO OFRECE “COLABORACIÓN” AO EXECUTIVO

Segundo explica o colectivo veciñal, os representantes do Vencello solicitarán unha reunión co executivo municipal para presentarse formalmente e amosar a súa inquedanza
sobre este e outros temas que preocupan na localidade. “Cremos que é primordial atallar
este problema canto antes porque unha localidade como Burela, que sempre se
caracterizou polo dinamismo, a iniciativa, a puxanza e o emprendemento, non se pode
permitir o luxo de permanecer paralizada preto dun ano”, insisten, para ofrecer “a nosa colaboración ao Concello” para reverter a situación.