O Concello de Mondoñedo vén de crear o premio Rei das Tartas, que contará cunha dotación económica de 1.000 euros e que recoñecerá a aquelas persoas que presenten un proxecto de promoción da cidade. Ademais, o gañador ou gañadora recibirá placa e diploma.

O obxectivo do galardón, segundo o goberno local, é “crear embaixadores e embaixadoras de Mondoñedo e dos seus recursos”.

O certame será un dos actos de homenaxe á figura de Carlos Folgueira, o Rei das Tartas, que coinciden co vixésimo quinto aniversario do seu pasamento.

OFRENDA FLORAL

Así, o vindeiro sábado haberá un acto de recoñecemento no salón de plenos, ás 12.30 horas. Logo das intervencións realizarase unha ofrenda floral diante do busto do pasteleiro, na travesía que leva o seu nome.

A alcaldesa de Mondoñedo, a popular Elena Candia, resaltou “o moito que promocionou Carlos Folgueira Mondoñedo, a súa tarta e os seus recursos”.