Ribadeo exaltará na mañá do 29 de xullo, dentro do Mercado dos Domingos, o seu produto local. Degustacións, obradoiros e actuacións musicais serán os integredientes dunha xornada adicada a valorar o horto ribadense e o comercio de proximidade.

Organizan a actividade o Concello de Ribadeo e a Asociación de produtores e produtoras da Horta de Ribadeo A Sucadoira, en colaboración coa Aula de Produtos Lácteos de Lugo da Universidade de Santiago de Compostela (USC) e o Centro de formación e experimentación agroforestal (CFEA) Pedro Murias.

PROGRAMA

A xornada comezará cun ecoalmorzo, doce e salgado, que se ofertará desde primeira hora. Ás 11.00 horas arrincará un obradoiro titulado Aprende a facer un horto no teu balcón. Os asistentes desfrutarán de recomendacións para poñer en práctica unha mini produción agrícola caseira. Anotan para a actividade no correo adl@ribadeo.org, ou no número de teléfono 982.128.650.

Entre as 12.00 e 14.00 horas, ao remate do taller, o dúo que forman Íria Estévez e Gonzo Piña interpretarán fados e outras músicas populares. Ás 13.00 horas, a organización disporá dunha cata de tomate dirixida por especialistas da Aula de Produtos Lácteos da USC. Os expertos darán consellos para aprender a diferenciar e valorar o tomate ecolóxico da zona, do que o CFEA Pedro Murias ofrecerá unha mostra.

Por último, os bares da contorna ofrecerán a tapa do mercado como tapa de cortesía. Participarán na iniciativa os seguintes locais: Fumarel, Delicias, Taller, Queimada, Prohibido, Ribeira e O Forno.

A edil de desenvolvemento local, Ana Martínez, asegura que o Mercado dos Domingos “é o mellor lugar para comezar a valorar o produto local, onde se achegan directamente os produtos ao consumidor, dos agricultores á mesa. Así”, resaltou, “potenciamos a economía máis próxima e o consumo de tempada e responsable”.