A organización da Feira do Bonito deu a coñecer o programa do evento, que se celebrará o sábado 4 de agosto e que conta con múltiples actividades paralelas.

ENCONTROS DE ARTE, CINEMA E ARTESANÍA

De feito, o programa festivo arrinca o día 2, cando arrincarán dous encontros culturais relacionados coa feira. Un deles será o segundo certame de pintura mural Amarte, no que participarán dez artistas e que contará coa presenza de Alfonso Otero Regal. A mostra de cine marítimo Ultramar, que disporá Raso Estudio, proxectará películas e documentais baseados no medio mariño.

O día 3 comezará unha nova edición de Produart, a exhibición de produtos artesáns e ecolóxicos que impulsa a Fundación Expomar. Tamén haberá deporte, coa estrea do Torneo Feira do Bonito de baloncesto 3×3 nas rúas.

O día 4, a actividade comezará ás 13.30 horas, coa recepción das autoridades no barco-museo Reina del Carmen. Ás 14.00 horas, o ex baloncestista Fernando Romay pronunciará o pregón, que dará paso á degustación. Haberá racións de bonito á grella, cocido ou en empanada, a oito euros, así como tapa de salpicón a un prezo de dúas unidades.

Pola tarde haberá xogos populares e elaborarase un tapiz alusivo á feira, por parte da asociación de alfombristas de Burela.

Pola noite será a presentación do Festival Osa do Mar, coa actuación dos grupos Os Amigos dos Músicos e Korrontzi.

DOMINGO

Os actos concluirán o domingo, cunha degustación de marmitako e sesión vermú.

PRESENTACIÓN, O VENRES

A presentación da feira será o vindeiro venres, ás 13.00 horas. Logo haberá unha degustación de bonito no restaurante Miranda, no porto burelés. Preparará os pratos a Asociación de Cociñeiros da Mariña.

O alcalde burelés, Alfredo Llano, resaltou a cantidade de citas que haberá na fin de semana, “que se complementan perfectamente”, e que ofrecen “unha ocasión única para visitarnos”.