A Asociación de Profesores de Automoción de Galicia (Apaga) poñerá en marcha no mes de xaneiro de 2020 unha plataforma de formación online.
O presidente de Apaga, Álvaro Doural, subliñou que “a partir de xaneiro de 2020 vaise poñer en marcha unha plataforma online para realizar principalmente os cursos realizados e potencialos máis. Toda a parte que é conceptual deste cursos que se están dando as fins de semana, que son oito horas, sería online. É unha nova experiencia na que a asociación vai investir toda unha serie de recursos humanos e económicos para poñer en marcha esa plataforma que dará resposta a outro tipo de demandas. Vai ir enlazada co proxecto europeo sobre vehículo eléctrico que se iniciou a semana pasada en Zagreb, no cal se van colocar aí tamén todos os produtos que se van elaborar”, precisou.
FINS DE SEMANA TECNOLÓXICAS
No tocante aos cursos formativos, Apaga continuará este sábado, 16 de novembro, coas súas fins de semana tecnolóxicas cun obradoiro de diagnose con osciloscopio. Ademais o día 20 de decembro organizará outro sobre aplicación de pintura no automóbil.
No primeiro dos casos, as 15 prazas están cubertas, polo que ante a demanda farase de novo a finais de xaneiro.
CURSO DE APLICACIÓN DE PINTURA EN COCHES
Doural contou que “tamén se vai facer outro curso o 21 de decembro sobre aplicación de pintura nos automóbiles, que é moi interesante e moi demandado, dado a gran necesidade que hai neste momento especialmente de pintores nas empresas da Mariña. Poderase acceder ao curso a través da nosa web, do correo electrónico da asociación que é apagaribadeo@gmail.com ou ben do teléfono 639.88.49.45”, indicou.