A Asociación de Comerciantes, Industriais e Autónomos de Mondoñedo (ACIAM) organiza, en colaboración co Concello, unha nova edición do Mercado das Carmiñas, que se celebrará o mércores 25 de xullo, Día de Galicia, na Praza da Catedral.

Dentro da celebración, que pretende recrear os mercados tradicionais que se celebraban antano na cidade, inclúese a Festa da Ensalada, unha mostra da aposta polos produtos da horta. 

O mercado comezará ás 10.00 horas na Praza da Catedral. Á mesma hora haberá unha concentración de coches e motos clásicas, que conta co impulso da Asociación de Clásicos Mindoniense ‘Mira e Anda’.

O cuarteto Souto Xímaro animará as rúas a partir das doce do mediodía. Media hora despois comezará a Festa da Ensalada, que terá lugar na rúa da Fonte ou Fontevella. Poderanse degustar pratos feitos con produtos da horta mindoniense, en cuncos que achegará Alfar de Mondoñedo.

TARDE

O concurso de ensaladas prolongarase ata as 15.00 horas. O evento continuará pola tarde. Kikinga organizará xogos para os nenos e nenas na Praza da Catedral desde as 18.00. Ás 20.00 horas haberá de novo animación musical, previa á entrega de premios do certame, que pechará o evento.