Este xoves arrinca a décimo primeira edición do Mercado Renacentista de Viveiro, que ata o día 7 fará volver á cidade ao Renacemento por unha fin de semana.
O xoves comezan as actividades en torno da Praza Maior e pola noite haberá tapeo en trece establecementos: Cornelius, Los Leones, O Muro, O Calviño, Casa Pepi, La Quinta, O Recuncho, El Garaje, O Rincón do Tronco, Normandy, Hotel Urban, Arume e Mesón da Ría.
Os actos máis relevantes comezarán o venres. Como novidade, os nenos poderán desfrutar de xogos populares antes do desembarco de Carlos V, que será ás 21.00 horas na praia de Covas, co posterior desfile cara a Praza Maior.
Para o sábado quedan os multitudinarios xantares no casco histórico, que ateigarán a zona vella da cidade. Antes, o grupo coral Tempus Fugit interpretará un repertorio da época renacentista polas rúas de Viveiro.
O domingo seguirán ata a noite as actividades para grandes e pequenos, que contarán cun recuncho infantil durante os días da celebración.