O cámping A Gaivota de Barreiros anunciou o pasado venres que poñerá en marcha en setembro unha escola de surf e un surf camp para este tipo de deportistas, con aloxamentos relacionados con este deporte.

O propietario destas instalacións, Celso Dourado, explica que o surf camp consistiría en “aloxamentos na súa maioría móbiles pensados única e exclusivamente para os surfistas”.

O xerente e propietario do cámping subliña “a enorme afluencia de surfistas que temos” no negocio pois “xusto diante del danse as condicións idóneas para a práctica deste deporte”.

Deste xeito, está a traballar con surfistas de Sopelana, no País Vasco, para levar a cabo esta iniciativa “un tanto complexa, pero que co seu asesoramento esperamos sacala adiante”.

Dourado engadiu que “estamos dándolle forma ao proxecto, coa posible sociedade con xente preparada dentro do mundo do surf para a creación da escola, que tentaremos empezar a últimos de verán”.

TRINTA ANOS

O surf camp súmase á oferta do cámping A Gaivota que conta tamén con caseríos e cabanas dotadas de cociña, menaxe, frigorífico, baño, sala de estar-comedor, dormitorios e terraza.

Ademais, ten unha área de acampada totalmente arbolada e coas parcelas delimitadas por setos vexetais. Este ano cumpre tres décadas esta instalación na que a madeira, o cristal e a pedra son os elementos principais da súa construción, deseñada e realizada por Dourado.