O Concello de Barreiros anunciou este venres que organizará un programa de talleres e charlas para educar en prevención de estereotipos de xénero e axudar a aquelas vítimas de violencia machista que o precisen, pero tamén a aquelas persoas interesadas en apoiar a quen padece a esta lacra. 

O plan ‘Enténdote, colle a miña man‘, organizado dende a concellería de Igualdade do Concello de Barreiros coa colaboración de Mujeres en Igualdad de Burela e a Xunta de Galicia, está destinado a mulleres maiores de idade.

Durante catro días trataranse temas como o traballo en igualdade e a prevención, información ou asesoramento sobre a violencia de xénero.

Autoestima, motivación ou mesmo orientación para a inserción laboral tamén se abordarán nas sesións.

A PRESENTACIÓN, O LUNS

A xornada de presentación celebrarase o vindeiro  luns no centro sociocultural Manuel Díaz Sampedro, en San Cosme, ás 11.00 horas. As conferencias e talleres serán na semana do 19 ao 23 de agosto, en horario de 10.00 a 12.00 horas no mesmo lugar.