San Cibrao contará coa primeira pista profesional de skate (bowl skate) da Mariña Lucense. A instalación construirase a partir do mes de xullo no Parque Reina Sofía.

O alcalde de Cervo, Alfonso Villares, e a edil de cultura, Dolores García Caramés, mantiveron un encontro con integrantes do Club Limosa Surf para informalos do inicio das actuacións, financiadas por completo con fondos municipais. A previsión é que a pista estea lista, segundo asegurou o rexedor, “en dous meses ou menos”.

HOMOLOGADA PARA A COMPETICIÓN

Villares asegura que a instalación será “a única da comarca destas características e unha das poucas que hai en Galicia homologadas para este tipo de competicións”.

A pista quedará “perfectamente integrada na contorna, e foi concebida como un punto de encontro para a mocidade do concello, dada a afección que hai polo patín, sen que se vexa afectado o parque biosaudable urbano ubicado nesa zona. Conseguiremos que convivan diferentes ambientes e diferentes xeracións”, espuxo o alcalde.