Un total de 46 persoas da Asociación de Pais e Nais de Nenos e Adolescentes con Necesidades Especiais (Aspanane) fixeron en catamarán a ruta dos Canóns do Sil en Doade. A Deputación Provincial de Lugo financiou a actividade, na que participou o deputado de relacións institucionais, Álvaro Santos Ramos.

O colectivo mariñao desfrutou da ruta que vai de Santo Estevo ata o Mosteiro de Santa Cristina. Os integrantes da excursión poideron visitar as instalacións da Rectoral de Gundivós, no concello de Sober, e comprobaron o traballo dos artesáns cunha demostración en vivo de olería. Foi unha aprendizaxe que os socios de Aspanane poderán incorporar nas súas actividades do centro ocupacional de Viveiro, pois soen practicar obradoiros de cerámica ou carpintería.

Este tipo de viaxes favorecen a integración social destas persoas, que recibiron de Santos Ramos un xogo de puzzles e crebacabezas, que potencian a estimulación cognitiva e as habilidades motrices.

PERSOAS DE CINCO CONCELLOS

Aspanane ofrece un servizo de centro ocupacional para 50 persoas con discapacidade intelectual, procedentes de O Vicedo, Ourol, Viveiro, Xove e Foz, e conta cunha achega de 51.500 euros do ente provincial.