O Concello de Cervo, coa colaboración da Consellería de Medio Ambiente e de Ordenación do Territorio, executa nestes días as obras de mellora do abastecemento de auga na urbanización de Río Covo. O investimento, para a creación dunha nova rede, será duns 200.000 euros.

400 VECIÑOS BENEFICIADOS

Durante os próximos catro meses, os operarios da empresa Hordescon S. L. actuarán a longo de 1.502 metros de tubaxe, o que supón a totalidade da rede da urbanización. O Goberno galego calcula que 400 veciños se beneficiarán desta obra, coa que se mellorará o subministro de auga potable, e a calidade e presión da mesma.

A obra enmárcase nun convenio de colaboración asinado entre Augas de Galicia e o Concello de Cervo. Ademais da renovación da rede de abastecemento de auga, o acordo inclúe a reposición do pavimentado das rúas e outras melloras, como a modernización de arquetas, puntos de mostraxe e válvulas. O alcalde, Alfonso Villares, e o delegado territorial da Xunta, José Manuel Balseiro, comprobaron as actuacións.