O xindicato CIG-Saúde alertou publicamente de que os datos oficiais sobre as listas de espera do Servizo Galego de Saúde (SERGAS) «non coinciden nin de lonxe coa espera real» que sofren os pacientes da Mariña luguesa. A organización sindical sinala que estas demoras son a consecuencia directa das «políticas de recortes do Goberno galego», ás que acusan de deteriorar a sanidade pública para «favorecer os intereses da sanidade privada».

Dende a CIG-Saúde censuran, ademais, o progresivo incremento de derivacións de doentes da comarca cara a centros sanitarios privados situados fóra da Mariña, tanto para intervencións cirúrxicas como para probas diagnósticas. Segundo a central sindical, dende as direccións dependentes da Consellería de Sanidade estase a «normalizar» o envío de pacientes cara aos hospitais Polusa e Virxe dos Ollos Grandes en Lugo, ou cara ao Ribera Juan Cardona de Ferrol.

Situacións límite nas probas endoscópicas

A organización cualifica de «especialmente sangrante» o caso das probas endoscópicas realizadas nestes centros privados de fóra da comarca. Segundo sinalan, recolléronse relatos de pacientes que, debido aos efectos secundarios das preparacións e das propias probas, «tiveron que parar na beiravía» durante a viaxe de volta por indisposicións dixestivas graves.

Por outra banda, o xindicato rexeita que dende a Xunta se pretenda xustificar o aumento do tempo de espera na folga de médicos ou derivar responsabilidades cara ao Goberno do Estado. Lembran que a xestión sanitaria e o control das listas de agarda son competencia «exclusiva» da Consellería de Sanidade.

Para finalizar, a CIG-Saúde instou ao Executivo galego a apostar de xeito decidido pola sanidade pública. Reclaman que o investimento non se limite ao incremento de metros cadrados nas infraestruturas, senón que se dote á comarca de máis servizos sanitarios e de máis profesionais de tódalas categorías para poder solucionar este problema de raíz.