A área Sanitaria de Lugo, A Mariña e Monforte de Lemos saíu a desmentir a falta de material nos centros de saúde da zona, tal e como denunciou este luns o comité de centros de primaria da área, que aseguraba que existen “graves deficiencias” na subministración de material. Ademais, insisten en que está “garantido” o “normal funcionamento” do sistema de subministracións.

A xerencia aclara que o envío de materisal sanitario realízase “conforme aos consumos reais de cada centro e mediante sistemas informatizados que permiten a rastrexabilidade completa dos pedidos”.

Explican que, desde a Dirección de Recursos Económicos e ou Servizo de Subministracións, o material sanitario envíase “de maneira regular e nas cantidades necesarias, adaptadas aos consumos e tendo en conta o tamaño do servizo, a actividade desenvolvida, a poboación adscrita e as necesidades que poidan xurdir en cada momento”.

“O obxectivo é garantir que todos os servizos e unidades asistenciais dispoñan dos recursos precisos para desenvolver a súa actividade con absoluta normalidade e seguridade”, destacan.

Negan, ademais, as acusacións de “manipulación” ou “falsidade nos pedidos”. “O sistema informático corporativo permite comprobar en todo momento as cantidades solicitadas polos centros e as autorizadas polos órganos competentes, en virtude dos pactos de consumo establecidos con cada unidade e servizo, asegurando a transparencia e a rastrexabilidade completa do proceso”, sinalan.

Con todo, apuntan que iso non exclúe que, “de maneira puntual”, poidan producirse roturas de stock dalgún produto concreto. “Son situacións excepcionais para as que a área sanitaria dispón de mecanismos específicos para restablecer e repor o material con axilidade, garantindo a continuidade asistencial”, defenden.

Sobre isto, detallan que nestes casos actívase a subministración urxente desde outros dispositivos asistenciais ou almacéns dispoñibles, “evitando así que estas incidencias teñan impacto na atención aos pacientes”.

DENUNCIA DO COMITÉ DE CENTROS

Este luns, o Comité de Centros de Atención Primaria da área Sanitaria de Lugo, A Mariña e Monforte emitía un comunicado no que denunciaba “graves deficiencias” na subministración de materiais nos centros de saúde de todo a área.

Segundo explicaban, as deficiencias na subministración afectaban a produtos básicos, “necesarios para o funcionamento diario”, tales como vendas ou, apuntaban, mesmo a materiais “indispensables para garantir a seguridade e cumprir cos protocolos de prevención de infeccións”, tales como luvas estériles e máscaras FFP2.

Denunciaban tamén determinadas prácticas consistentes na remisión de albaranes cos pedidos “manipulados e falseados”. “Sempre se igual nos albaranes as cantidades servidas coas cantidades pedidas polo persoal, reducindo estas ata o número que lles convén enviar e faltando ao respecto aos traballadores que fan solicitudes de material segundo as necesidades asistenciais, censurando e pondo en dúbida o seu rigor e a súa capacidade como profesionais sanitarios”, lamentan.