O Diario Oficial de Galicia (DOG) recolle este luns a delimitación dun novo ámbito de solo residencial en Ribadeo que permitirá a construción de 300 vivendas, das que 240 serán protexidas, segundo informou a Xunta. A Administración autonómica explicou que a delimitación inicial —que poderá sufrir variacións durante as fases de redacción e tramitación— abrangue unha superficie situada entre a avenida de Ribadeo ao norte, o camiño de Reverte a Vilar ao leste e diferentes viarios municipais e parcelas ao sur e ao oeste.

O ámbito conta cunha extensión de 7,6 hectáreas e intégrase dentro do programa da Estratexia Galega de Solo Residencial. Coa publicación no DOG, este solo pasa a ter consideración de interese autonómico, converténdose na primeira actuación destas características na provincia de Lugo e na undécima en toda Galicia. Segundo destacou a Xunta, o obxectivo desta iniciativa é incrementar a oferta de vivenda, especialmente a prezos accesibles, e facilitar o desenvolvemento urbanístico en concellos con demanda residencial.