A conselleira do Medio Rural, María José Gómez, acudiu este sábado á XXXIII Festa da Faba de Lourenzá, onde destacou a calidade da produción amparada baixo a Indicación Xeográfica Protexida (IXP) Faba de Lourenzá.

Así, segundo trasladou a Xunta nunha nota de prensa, a responsable autonómica sinalou que esta IXP conseguiu unha produción comercializada de case 14.000 quilos en 2024.

Así mesmo, lembrou que a Administración galega convocou axudas para esta IXP coa finalidade de cubrir parcialmente os sobrecustos que implica producir esta faba galega con estándares de calidade superiores aos comúns, ademais de axudar a paliar os danos provocados polas choivas intensas de primavera de 2024 que afectaron á colleita.

Nesta liña, a conselleira afirmou que a Xunta apoia a este sector a través de medidas complementarias, como liñas de investigación a través do Centro de Investigacións Agrarias de Mabegondo e accións para o fomento da IXP e para impulsar a incorporación de produtores ao distintivo.

Ademais, apuntou que se traballa na posta en marcha de espazos de especialización e innovación agraria nos diferentes centros dependentes da Consellería.