Un mozo de Foz enfróntase a unha pena de cinco anos de prisión por arrincar parte dun dedo a outro mozo durante unha pelexa na zona de lecer nocturno desa localidade. A Audiencia provincial de Lugo xulgou este martes a este mozo (que conta con antecedentes penais por lesións) por uns feitos que tiveron lugar no mes de agosto de 2022, cando se encerellou en dúas pelexas con outro home. Nun dos enfrontamentos, o acusado supostamente arrincoulle parte dunha falanxe da man esquerda dunha dentada.

Na súa declaración ante o tribunal, o procesado asegurou que a vítima lle ameazou en ocasións anteriores dicíndolle “eu mando nesta zona de Foz” e que o día dos feitos perseguiulle, sacou un coitelo e, tras suxeitarlle polas rastas, tentou atacarlle con el, polo que lle mordeu para desasirse. Así mesmo, alegou que estaba bébedo e que a pelexa foi vista por numerosas testemuñas, mentres que os axentes da Garda Civil que acudiron ao lugar chegaron cando a discusión xa finalizara, e atoparon tirados no chan tanto a parte do dedo amputada como unhas rastas de pelo arrincadas.

A vítima, que tamén interveu no xuízo como testemuña, deu unha versión contraria, dicindo que estaba só e que foi o acusado o que lle atacou en primeiro lugar cando saía do restaurante onde traballaba para botar o lixo. Segundo declarou, recibiu patadas na cabeza que o deixaron “mareado” e foi suxeitado polos familiares do acusado. A defensa alegou incongruencias na declaración da vítima no xuízo con relación á toma de declaración tras os feitos.

A Fiscal pide, ademais do cinco anos de cárcere, coa agravante de reincidencia, que o acusado pague unha indemnización de 8.000 euros polas lesións sufridas e para o Sergas de 1.244 euros pola atención prestada á vítima, xa que tiveron que intervirlle cirurxicamente. Pola súa banda, a acusación particular eleva a súa petición de pena de prisión ata os 6 anos, e reclama unha indemnización de 21.000 euros.