Os Reis Felipe VI e Letizia visitarán Burela o vindeiro martes 17 de xuño, segundo informa este Concello lugués, nun acto vinculado á pesca e ao mar. “Trátase dunha visita de especial simbolismo para a nosa vila, estreitamente ligada ao mar, á súa cultura, economía e identidade”, destaca o Consistorio nun comunicado. A presenza da Casa Real supón, segundo reivindica, un “recoñecemento a Burela como un dos centros pesqueiros máis importantes do país”, cun porto e lonxa referentes no sector. Así, subliña que o martes 17 será “un día importante” e agradece esta visita como “un xesto de apoio institucional e un impulso para seguir defendendo a pesca como motor económico, social e cultural do territorio”.