Decenas de profesionais sanitarios do Hospital de Burela concentráronse este venres, por undécimo día consecutivo, ante as portas do centro ante a súa “incapacidade de cubrir as necesidades” da poboación da comarca da Mariña, o cal achacan a “recortes” por parte da Xunta. A través dun comunicado, a xunta de persoal, que é a que convoca estas protestas diarias, denuncia que a falta de persoal e de recursos provoca que os pacientes deban ser trasladados ao hospital de Lugo para un ingreso, “co trastorno que isto implica” tanto para eles como para as familias.

Os manifestantes advirten de que as listas de espera do centro mariñán “non fan máis que crecer”, á vez que “falta persoal”. Neste contexto, critican que, despois de continuas reclamacións, a resposta recibida foi unha “orde verbal de derivación directa de todas e todos a pacientes da área médica subsidiarios de ingreso”. En definitiva, a xunta de persoal solicita que se completen os persoais cos “recursos humanos necesarios” e que paren os “recortes” na sanidade pública.