Un veciño de Viveiro, de orixe guineana, aceptou este xoves unha pena de seis meses de cárcere e unha multa económica de mil euros por un delito de branqueo que capitais, polo que se lle pedía nun principio tres anos de cárcere ou a expulsión do país, ao exercer de mula bancaria para unha estafa cometida a terceiros por hackers. O home, que estivo presente na lectura da conformidade por viodeoconferencia, aceptou os cargos aos que se lle engadiu a matización de imprudencia grave, polo que se reduciu a pena imposta.

Ao ser esta inferior a un ano e non ter antecedentes penais, non terá que entrar en prisión a condición de que nos próximos dous anos non cometa ningún delito. Tamén, a multa de mil euros ten prazo para pagala ou será substituída por dez días de cárcere, pero debido á súa insolvencia tampouco tería que cumprila se non volve delinquir.

Os feitos remóntanse a 2021, cando participou nunha estafa efectuada por hackers informáticos a través dun artificio que pirateaba a aplicación móbil dunha entidade bancaria. O acusado facilitou o seu número de conta para recibir os ingresos das vítimas e quedar cunha porcentaxe do diñeiro. Así, recibiu na súa conta dous cargos de 660 e 340 euros, cantidade que xa foi reintegrada á vítima.