A circulación ferroviaria entre Ribadeo e Xove, da liña de ancho métrico Ferrol-Oviedo-Xixón, foi restablecida este xoves 2 de xaneiro, segundo informou Adif, despois de que o pasado 28 de decembro un tren de pasaxeiros en Foz descarrilase, sen deixar feridos, tras atropelar a dous cabalos. Un tren de pasaxeiros, no que só viaxaban o maquinista e o interventor, descarrilou en Foz tras atropelar a dous cabalos o sábado 28 de decembro sobre as 07.40 horas e foi o persoal de Renfe quen deu a voz de alarma.
O tren cubría o traxecto Ribadeo-Ferrol e a liña ferroviaria tivo que ser cortada. Con todo, estableceuse un plan alternativo de transporte por estrada entre Ribadeo e Burela. Tras os traballos pertinentes, a circulación quedou restablecida, segundo informou 112 Galicia a través dunha mensaxe na rede social X.