A presenza de exemplares de carabela portuguesa obrigou este domingo a pechar ao baño dúas praias do municipio lucense de Cervo, á vez que puxo en alerta outros puntos da Mariña.

En concreto, desde o Concello de Cervo alertábase ao longo do domingo da aparición de exemplares desta medusa, cuxa picadura é moi dolorosa e pode xerar efectos graves, na Praia de Torno e na Praia de Cubelas, onde se izou a bandeira vermella para prohibir o baño.  Ao longo desta fin de semana, exemplares desta especie tamén foron localizados na Praia de Esteiro, en Ribadeo, e na Marosa, en Burela, onde o sábado ondeou a bandeira vermella.

O incremento da temperatura da auga trouxo este verán exemplares deste tipo de medusa, moi rechamante, a Galicia. En concreto, a comezos deste mes de agosto dábase a voz de alarma na zona de Vigo e O Grove pola aparición de carabela portuguesa.