A EOXI de Lugo responde ás novas críticas realizadas este venres pola CIG-Saúde da Mariña, apuntando ao “noso firme compromiso coa sanidade pública do distrito sanitario da Mariña, e neste caso, co Hospital Público”. Así mesmo, a EOXI “fai todo o posible por prestar a mellor atención aos cidadáns e intentando achegar o maior número posible de especialidades a este centro”. Como exemplo disto, sinalan a posta en marcha de oncohematoloxía e doutras especialidades que aumentaron a carteira de servizos deste hospital. A isto suman a ampliación do Hospital, que aínda continúa, e que “non só aumentará o espazo dispoñible, senón que tamén permitirá mellorar servizos como o de Radiodiagnóstico, dotando ao Hospital da Mariña dunha resonancia magnética nuclear fixa”.

A EOXI aputna que a CIG debería saber que nestes momentos a falta de especialistas para realizar substitucións e cubrir todas as ausencias nos distintos centros sanitarios, “é unha realidade que afecta, non só á Mariña, senón a todo o estado español”. Este ausencia de especialistas para realizar substitucións afecta en maior medida a hospitais comarcais e tamén a determinadas especialidades, entre elas, Medicina Interna. Malia iso, a EOXIS sinala que “estamos absolutamente dedicados a prestar a maior e mellor atención posible aos habitantes do distrito sanitario da Mariña, empregando todos os recursos asistenciais da sanidade pública que den resposta inmediata ás necesidades de cada paciente”.

DERIVACIÓNS A CENTROS PRIVADOS

Sobre a derivación dalgúns pacientes pendentes de cita no Servicio de Rehabilitación do Hospital Público da Mariña ao hospital Polusa, desde a EOXI indican que o Sergas ten asinado un concerto con dito centro sanitario. Esta situación ademais, afecta a pacientes crónicos pendentes de ser vistos no hospital público de Burela. Dita prestación asistencial “ofértaselle ao paciente coa fin de axilizar a resolución clínica e asistencial do seu proceso” e, deste xeito, “prestarlle unha asistencia sanitaria máis rápida, sempre, insistimos, como alternativa asistencial e co seu consentimento”.

Unha vez realizada a consulta, se o facultativo indica a necesidade de acudir a fisioterapia, esta préstase en Burela, e non no Polusa. A EOXI tamén destaca que “non foron máis de 200 os pacientes derivados, senón en concreto 170 dende o pasado mes de novembro e, insistimos, coa única finalidade de prestarlle unha asistencia máis rápida”.