O BNG de Cervo levou adiante a colocación dunha pancarta para reclamar infraestruturas para A Mariña. Os nacionalistas levaron adiante a súa reclamación colocando unha pancarta na ponte de Lieiro sobre a ría de San Cibrao. Así mesmo, declararon: “En Cervo coñecemos de primeira man o que supón vivir entre promesas que nunca chegan a asfaltarse. Durante décadas, vimos como o progreso pasaba de largo ou se desviaba cara ao interior, mentres a nosa veciñanza e as nosas empresas seguen atrapadas en estradas de hai máis de 25 anos” así se expresaba o concelleiro nacionalista David Villares despois de colocaren unha faixa reivindicativa polas infraestruturas na entrada de San Cibrao, e continuaba amosando a súa contrariedade e malestar porque “as infraestruturas de comunicación son unha cuestión de seguridade e futuro: levamos máis de 25 anos agardando pola execución da A-74 e a VAC Costa Norte, o tren converteuse nunha caricatura romántica que custa ver cruzar as nosas vilas porque non hai frecuencias, o peirao exterior de Morás xa non forma parte da axenda política”

Afirman os nacionalistas de Cervo que San Cibrao é o pulmón económico da Mariña, “mais as empresas locais e os cidadáns seguen sen unha conexión directa por autovía”. Non se pode falar de competitividade mentres non teñamos infraestruturas de comunicación á altura deste século.

Deterioro dos servizos públicos e malas comunicacións

O BNG de Cervo denuncia tamén que “igual que os nosos veciños de Burela, Xove, Viveiro e O Vicedo, en Cervo sufrimos o deterioro duns servizos públicos que se ven agravados polas malas comunicacións. Unha sanidade de calidade tamén depende da facilidade para chegar a ela”. p Dende que se decidiu levar a Autovía do Cantábrico por Vilalba, Cervo quedou nun “punto morto”.

Animan tamén a asistir ao acto público sobre infraestruturas “Viveiro e A Mariña merecen máis” que terá lugar o próximo venres en Viveiro ás 19:00 na sala multiusos do concello e no que participarán Seve Salgueiro, Iria Cotelo, Daniel Castro e Néstor Rego.